قبل ماندخل في الموضوع فيه حاجتين صغيرين
الحاجة الأولي..أن بقالي فترة ماكتبتش حاجة جديدة علي المدونة هنا...ماكانش لي نفس اكتب حاجة...وماكنتش أتمني اني لما أرجع أكتب في الموضوع ده...بس اهو بقي..
الحاجة التانية.. اني مابحبش في العادة اكتب بالعامية...بس هي طالبة معايا في الموضوع ده اكتبه زي مايطلع من جوايا
ايه الحكاية بقي؟؟
الموضوع كبير...وانت لسه نايم... ولسه مش عايز تفهم...ولسه مش عايز تفوق...طيب امتي؟؟..كنا زمان نقول لما نبقي زي فلسطين؟...واحيانا نضرب المثل بلبنان لما نتكلم علي الوحدة الوطنية والفتن الطائفية ....بعد 2003 بقينا نضرب المثل بالعراق... ومن 2007 ابتدينا نفوق علي مشكلة السودان..اللي خلااص ايه راحت في الطريق. بلاش كلام كبير غير محسوب وعشوائي ومكرر...لأني في الحقيقة كنت لسه بقرأ في دراسة لعالم الاجتماع السيد ياسين عن المدونات العربية وحالها.. وكان موجهلها انتقاد لاذع وبيصفها بالعشوائية وعدم العمق وقلة الوعي...خلينا نتكلم زي ما الكبار عايزين
انا هاقسم الموضوع أربع نقاط أساسية عايزك تبقي فاهمهم كويس من الحكاية دي
الأولي...انت لست متهما
والجملة دي...لكل مسلم ملتزم في الظاهر دينيا...يعني ملتحي مثلا...ليه بقي هو بالذات؟
علشان هو أولا في الغالب هيلاقي نفسه مضطر يوضح موقف الاسلام لصحابه في الدردشات والثرثرة التي لا تنتهي بصفته اللي فيهم يعني واللي عارف كل حاجة ( من وجهة نظرهم)...انت لست متهما أخي في الله... الاسلام لا يحض أبدا علي القتل... ولا الظلم...الاسلام دين ( تبروهم وتقسطوا اليهم).. ونصيحة اقرأ البيان ده هتلاقي فيه اللي يفيدك
وعلشان ثانيا.. قد تجد نفسك -لا قدر الله- معرضا للاضطهاد.. اضطهاد؟... ايوه ياجماعة اضطهاد...هو برده النظام مش بيتضهد الملتزمين دينيا....حتي لو التزامهم كان ظاهريا وهو مابيعرفش حتي ازاي يصلي؟...حتي لو واحد سايب دقنه مزاج برده... ولا ده مش حقيقي؟... وبصراحة شديدة هذه فرصة مثلي للنظام لزيادة الاضطهاد...ولكن..وسأقولها لك علي طريقة الليبراليين حتي أبدو مثقفا....اذا كنت تعتقد حقا أن ماتفعله صوابا وانت علي يقين من ذلك.. فكن رجلا..والتزم بمبدأك...ثم ان كانت هذه النغمة في الكلام لا تروقك أنت..فسأقولها لك علي طريقتك...ماتخافش...ربك هيسترها وهتيجي سليمة ان شاء الله...سيبها علي ربنا وهو أكبر من الكل...اصبر واحتسب ولا تقلق!
الثانية...مصلحة من؟.. وأي هراء هذا؟
اديني انت عقلك ورد علي الاسئلة دي:
السؤال الأول..من مصلحة مين الحادثة العقيمة دي؟...
هل المسلمين الأغلبية الوحوش...اللي مش سايبين الأقليات الدينية تعيش في حالها؟
لابد وأن أغلب قراء هذا المقال ليسوا من أقباط المهجر ولا من أدعياء الفتنة والاستقواء بالخارج لتدمير البلد.. ولكنهم من المصريين اللي عايشين في أم المخروبة دي...ولذا..فهم يعلمون جيدا الآتي:
**أن حال المسلمين يصعب علي الكافر...وأن الحكومة مش مدياهم فرصة ولا يتكلموا في السياسة ولا في الدين...ومخلية الغالبية العظمي منهم نسي عقله وهو بيجري ورا لقمة العيش..اللي عمره ما بيوصلها..ومش مهم لقمة العيش هنا تبقي لقمة عيش بحق وحقيقي...انما هي رغباتك المكبوتة كمواطن يرغب في أن يعيش حياة كريمة مستقرة يشعر فيها بانسانيته وحقه الآدمي في احترام نفسه والآخرين...انسي ياعمرو...لو ده العيش اللي بتدور عليه...لما تشوف حلمة ودنك!
** ان أغلبية المصريين ناس غلابة ولا ليها ولا في الطور ولا في الطحين...اتعودت تسمع الكلام وتتلقي الأوهام وهي ساكتة وفاهمة انه مش من حقك تفهم حقوقك ايه...لأنك اساسا ملكش حق
** اما بقي الكلام عن الارهاب والجماعات والكلام ده..فمتهيألي ده انتهي زمنه والحمد لله...فأتمني يارب ألا يستغل النظام الأمني الحادث ويكشف عن أنيابه ليلوك مصطلحات انتهي عصرها وولي من تسعينيات القرن اللي فات...ياجماعة ده كلام من القرن اللي فات... وانتوا عارفين انه مابقاش موجود... يضركم في ايه بقي ان الواحد يصلي الفجر في جماعة علي حد تعبير واحد صاحبي؟
السؤال الثاني ..من المتضرر الأول من الحادثة العقيمة دي؟
مع كامل احترامي...وعميق اسفي... وحزني.. بجد والله...للموتي في هذه الحادثة انما لازم نبص علي الحادثة من فوق أكتر...نظرة شمولية ....مين الخسران...وعلشان نفهم ده لازم نفهم ايه تبعات ونتائج الحادثة
أولا: النقطة الأوضح... وأتمني ألا تحدث.. هي زيادة تجييش اخواننا في الوطن المسيحيين... من قبل قلة متحكمة في شئون الكنيسة الأرذوكسية المصرية التي تسميهم... شعب الكنيسة (كأنهم مش من شعب مصر يعني لا سمح الله).. هذه القلة التي هي من مؤسسي جماعة الأمة القبطية...رأس الفتنة الطائفية في مصر......والتي هي سبب كبير من ضمن أسباب الاحتقان ومظاهر الفرقة وياااارب مايطورش ده لفتنة...لأنه في الفتنة لا صوت لعقل.. ولا أحد ينتصر...فالكل مهزوم
ثانيا: استغلال الأمن لهذه الحادثة لزيادة احكام قبضته علي الشعب الغلبان...والتضييق علي الملتزمين دينيا..الأمن الذي فشل في حماية الشعب...وخلانا نسمع لأول مرة عن سيارات مفخخة ...مش عارف ليه جيه علي بالي دلوقتي..حريق القاهرة في السبت الأسود يناير 1952...... والذي قيل حينها ان القصر هو الذي دبره لاسقاط حكومة الوفد...العلم عند ربنا!
ثالثا:بدت تباشير التدخل في شئون مصر تبدو...وتصريحات أوباما والغرب من باب.. الغمز واللمز...يجعلك تتساءل هل هي لعبة من الغرب والمخابرات الغربية مع النظام؟
رابعا: لك أن تتساءل البلد بالمنظر ده رايحة فين؟...حينما تسمع عن قطع للطريق الدائري وهجوم علي مبني ثالث أهم محافظة في مصر....ثم تفجيرات بسيارة مفخخة في ليلة رأس السنة....لماذا هذا التخاذل الرهيب من نظام هو في المقام الأول نظام أمني؟ أنا فعلا والله مستغرب
مش هاقولك مين المتضرر... سيبك من اللي انت فيه ده وفكر انت شوية بقي
النقطة الثالثة... اديني عقلك
**مش أولي اللي عامل الحادثة دي لأسباب طائفية انه كان عملها في يهود مولد أبو حصيرة؟؟
**مش تفكيرك في السؤال اللي فوق ده...خلاك تفكر ان ده مش واحد متضايق من المسيحيين وانما هو واحد عايز يولع الفتنة في البلد؟؟
**مش صعبة قوي وبزيادة انك تتخيل سيارة مفخخة في ليلة رأس السنة قدام كنيستين في مرحلة الاحتقان اللي البلد بتعيشها وتهديدات القاعدة....؟؟؟ اصلي حاسس الموضوع متظبط مش عارف ليه.. من مين ما أعرفش...بس اتفق معايا انه مش حاجة عادية يعني!!
النقطة الرابعة... انت السبب
ماتزعلش مني... انت السبب ايوه.. انا وانت... طول ما احنا عايشين وخلاص...بناكل ونشرب ونشتغل وننام... طول ما احنا مش بنجاهد نفسنا علشان نبقي احسن وبشر محترمين...طول مااحنا بنرمي زبالة في الشارع ومابنحترمش المرور...وبنتأخر في مواعيدنا... ومابنتقنش شغلنا....وقبل كل ده.. مضيعين حق ربنا....لازم يحصل فينا كل ده....بالله عليك ياعم فوق قبل ما نبقي عبرة لغيرنا...فوق واعمل اللي عليك علشان تبقي حتي أبرأت ذمتك قدام نفسك وقدام ربنا.
أخيرا...دعاء بسمعه كثيرا في صلوات الجمعة ومن المشايخ
اللهم احفظ علينا بلدنا مصر امنا امانا وسائر بلاد المسلمين
