الاثنين، ٩ أبريل ٢٠١٢

يوميات السويد...(3) في المترو


في اليوم الثاني من وصولنا... كان علينا أن ننتقل من Barkarby  الي   Stockholm  بالمترو ومن هناك الي Linkoping حيث مكان المؤتمر بالأتوبيس .
 وقفت علي باب محطة المترو مش عارف ادفع فين... لاقيت شباك سألت فيه... شاورتلي بايديها ... افتكرتها بتقولي لف من الباب.... لفيت من الباب لاقيت الباب مقفول خرجت تاني ومافهتمش... لاقيتها قفلت الشباك كمان... وقفت متردد شوية وبعد كده عديت تاني من الحاجز " شبه الماكينات اللي بندخل فيها التذكرة عندنا في المترو كده" ... بقيت واقف مش عارف اعمل ايه... أنا كده أصلا جوه المحطة... وممكن اركب المترو لما يجي من غير ما ادفع.... مش فاهم!!
بصيت حواليا لاقيت سمر كتير...هو مفيش واحد من أهل البلد دي اسأله ولا ايه؟
لاقيت شاب ملامحه أوروبية قاعد بيلعب في الموبايل بتاعه... رحت سألته:
-       هو أنا لو عايز أدفع ... ممكن أدفع ازاي؟
-       في الحقيقة في طريقتين للدفع... لاما تدفع كاش في المكتب اللي هناك ده
لاما عن طريق ال
SMS
- امممم... اصل المكتب مقفول ومفيش حد هناك
-       يبقي ماتدفعش... القانون كان بيقول ان لو مفيش حد علي الشباك يبقي دي فترة ممكن تستخدم فيها المترو ببلاش
-       طبعا انا في نفسي كنت بقول " ياااسلااااااااااام"
المهم قاللي ان ده القانون القديم .. وهم كانوا بيقولوا هيغيروه.. فلو مالقتش حد يبقي لازم تدفع بال SMS .... عموما انا مش متأكد اذا كان اتغير ولا لسه.. بس لو حد سألك علي التذكرة قوله انك مالقتش حد علي الشباب
-       .............
-       أو ... اممم ... بص ... هو في الحقيقة في برنامج بيعملك تذكرة fake  علي الموبايل... بحيث انك لو حد سألك توريهاله ... أنا ممكن اديهولك البرنامج ده
-       كل اللي جيه علي ذهني وقتها اني اسأله.... هو حضرتك متأكد أنك مالكش أصول مصرية؟؟