هدية

أمسك المصحف الصغير الحجم... بكلتا يديه
وسألني بطريقته التي تذيبني
- ايه د؟ انت ازاي بتقرا في القرآن الصغير د؟
رفعت عيني من الورق الذي أمامي و
أجبته وأنا ساهم في ذلك المصحف الذي بين يديه
- أنا لا اقرأ فيه ياعبد الرحمن
- امال انت جايبه ليه؟
قلت له... أنا ماجيبتوش
يحلو لي كثيرا الا أجيبه الاجابات الكاملة.. حتي يعود ليسألني من جديد وتستمر بيننا المناقشة العذبة
- أمال ايه؟
- ده هدية يابودي
سألني... من مين؟
- صمت
قال لي... وهو يشير الي العلبة الحمراء التي تحوي المصحف
هو مش القلب د ليه نص تاني؟
أعشق ذكاءه الحاد
أمس قلت لأمي... انه يذكرني بنفسي
الا أني كنت قليل الاسئلة... أو لنقل.. كنت اسألها لنفسي في صمت..لأنه لم يكن هناك من يجيبني
أيوه ... ليه نص تاني
امال راح فين؟
ااه منك ياعبد الرحمن... قلت لنفسي
اتكسر
ليييييييه؟؟
قالها بنبرة اسفة
انت كسرته؟ ولا علاء؟ (أخي الصغير) يبقي علاء كسره
ابتسمت في حسرة
لا مش علاء ياعبد الرحمن
أمال مين؟
الزمن
ازاي يعني؟.. هو عندك من امتي؟
قلتله من 7 سنين
ياااااا.. 7 سنين مرة واحدة
قالها وجري
فأجبت
نعم ياعبد الرحمن... 7 سنين
تخيل؟